Escolas Vigo: directorio de centros educativos.

A «E.I.M. Santa Marta» forma parte da «Rede Municipal de Escolas Infantís» do Concello de Vigo.

Contamos con tres unidades para crianzas dende os 3 meses ata os 3 anos, agrupados por idades e por quendas:

-  Aula 1:     8 crianzas.

-  Aula 2:   13 crianzas.

-  Aula 3:   20 crianzas.

As actividades lectivas desenvólvense dende setembro ata xullo, de luns a venres, en horario de 7:30 a 20:00 horas, dividido en dúas quendas (a de Mañá de 7:30 a 15:30, e a de Tarde de 16:00 a 20:00 horas).

O mes de agosto a Escola permanecerá pechada por mantemento das instalacións e por vacacións do persoal e do alumnado.

O Equipo Profesional está formado por persoal debidamente preparado e cualificado para o desempeño das súas funcións. Todo o persoal da Escola queremos que as crianzas medren nun marco educativo de calidade; creando, dende o respecto, un ambiente de benestar, confianza e seguridade, contribuíndo así ó seu desenvolvemento integral.

 A nosa Escola axudará a que as crianzas desenvolvan as súas capacidades ó máximo, a que establezan as súas primeiras relacións sociais e a que acaden hábitos de autonomía; descubrindo así o mundo que os rodea, e aprendendo a expresarse.

As linguas faladas no centro son, ó 50%, o Galego e o Castelán (consonte ó Decreto 150/2022, do 8 de setembro); prestando unha especial atención á aprendizaxe do idioma galego, mediante metodoloxías que faciliten a súa inmersión lingüística. Nas aulas trabállanse ámbolos dous idiomas oficiais. e introdúcese o Inglés como terceira lingua na aula de 3º. Asemade, tamén se integra a Lingua de Signos na rutina diaria da Escola.

Nesta Escola tamén ofrecemos ás familias usuarias reunións periódicas coas educadoras, participación e colaboración en distintas actividades, unha «Escola de Familias» organizada polo «Equipo de Orientación e Atención Temperá» e «Obradoiros de Familias» desenvolvidas por persoal cualificado un día ó mes.