Escolas Vigo: directorio de centros educativos.

UBICACIÓN

O centro está situado a carón da vía que une Vigo coa Cidade Universitaria e a escasos metros do Hospital Álvaro Cunqueiro. 
Ocupa unha parcela de 15.000 m2 con magníficos espazos verdes.

PRINCIPIOS
Partimos da consideración de que cada un dos nosos alumn@s é único e diferente e tratamos a diversidade como unha oportunidade de coñecer diferentes xeitos de aprender e relacionarse.

Asimesmo, temos a crenza de que a convivencia positiva e o benestar emocional son a base para que os nosos alumn@s se sintan felices e dispostos á aprendizaxe.

Tamén pensamos que a participación activa das familias na vida do centro é importante para que toda a comunidade educativa traballe nunha mesma dirección.

Foméntase que a metodoloxía de traballo na aula esté baseada en situacións de aprendizaxe que orienten ao desenvolvemento de tarefas integradas e das competencias clave en educación primaria. Na educación infantil baséase e metodoloxías activas e  no desenvolvemento de pequenos proxectos de aula.

QUE OFRECEMOS

Estamos inmersos en diversos programas a nivel de centro:

- Contratos Programa - CP Inclúe: Emocióna-T e Convive-T: destinados ao fomento da convivencia e benestar emocional.

- Contratos Programa - CP Innova: EduSaúde: destinado ao desenvolvemento da actividade física diaria e hábitos de vida saudables

- Contratos Programa Recupera-T: PROA+: Programa para a Orientación, Avance e Enriquecemento do alumnado máis vulnerable

- Club de Ciencia: espazo de aprendizaxe non formal baseado nunha metodoloxía de indagación onde os docentes suxiren diferentes accións enfocadas ao alumnado co obxecto de que podan dar respostas as súas curiosidades e intereses.

- Programa de subministro de frota e leite: programa enfocado á sensibilización dunha alimentación e hábitos saudables.

- PLAMBE - Plan de Mellora de Bibliotecas Escolares: destinado ao desenvolvemento do Plan lector e ao fomento e gusto pola lectura entre os escolares de todas as edades.

- Colaboramos co Concello de Vigo e outras institucións que nos ofrecen obradoiros de sensibilización ao alumnado sobre diversas temáticas: educación vial, drogodepencias, diversidade e identidade de xénero, bulling e acoso escolar, educación ambiental, redes sociais, etc.

Tamén dispoñemos de:

- Horta Escolar: dispoñemos dunha magnífica horta escolar, cun funcionamento moi activo e talleres a cargo da ONG "Amigos da Terra" , profesorado e familias.

- Actividades e saídas complementarias (excursións dentro do horario lectivo e extraescolar).

- Departamento de Orientación: aberto a toda a comunidade educativa e formado por orientadora e especialistas de Pedagoxía Terapéutica e de Audición e Linguaxe. O centro tamén conta con Auxiliar Técnico Educador.

- Seccións bilingües: 2 sesións de lingua inglesa en educación Infantil, 8 sesións de lingua inglesa en 1º ciclo de educación primaria e 4 sesións de lingua inglesa en 2º e 3º ciclo de educación primaria. O centro conta con Auxiliar de Conversa.

- 1 sesión diaria de Psicomotricidade a todo o alumnado de educación infantil

- 1 sesión diaria de actividade física (25 minutos de Movemento) a todo o alumnado de educación primaria, ademais das sesións de educación física correspondentes.

SERVIZOS COMPLENTARIOS

- Aula matinal xestionada pola ANPA con horario de 7:45 a 9:00 horas.

- Comedor escolar, con servizo de catering, xestionado pola ANPA.

- Transporte escolar ( 3 liñas).

- Actividades extraescolares xestionadas pola ANPA con horario de 16:00 a 17:30 horas.