Escolas Vigo: directorio de centros educativos.

O CEIP Plurilingüe Paraixal é un centro Plirilingüe. Este programa ten como finalidade fomentar a inclusión paulatina e uniforme da lingua inglesa no currículo dalgunhas materias de Primaria. Xa levabamos varios anos con seccións bilingües e a partir deste curso somos centro plurilingüe, promovendo tamén o uso da lingua galega.

O noso Colexio promove a tolerancia e o diálogo, defendendo unha escola aberta e pluralista, educando ao alumnado na libertade, no respecto ás diferenzas entre os pobos e as persoas. Propoñemos unha escola baseada na coeducación coa igualdade entre os sexos, tentando eliminar as diferenciacións nos roles, tanto do alumnado coma do profesorado.

Acercar ao alumnado a natureza é un dos obxectivos que perseguimos aproveitando a nosa privilexiada situación co noso bosque, o bosque da Buraquiña. Seguimos traballando no noso horto escolar.

Somos conscientes de que a escola debe preparar aos seus membros para a súa inserción na sociedade actual e polo tanto a alfabetización dixital supón un dos principais retos para o Centro.

Tratamos de que a Biblioteca sexa un eixo de encontro do traballo diario e desde esta coordinar aos distintos equipos formados no Centro. Durante o curso desenvólvense, entre outras, as seguintes actividades: mostra de outono, magosto, nadal, día da paz, entroido, día do libro, semana da prensa, letras galegas.

O colexio ten departamento de orientación e conta con especialistas de pedagoxía terapéutica e audición e linguaxe, que xunto co resto do profesorado atenden á diversidade.

Temos varios proxectos interdisciplinarios, como é "Paraixal chefs, a reubicación de espazos amables, voz natura e a radio entre outros.
O horario é en xornada continuada de mañá.